Lan jo ta rostlina, kótaraž za Łužycu stoj a łužysku identitu sobu wucynijo. Stare luźe znaju hyšći ten cas, źož jo kuždy swóju smugu z lanom sam měł. Gaž pak źinsa jězdźimy pśez Łužycu, pytaš we wjele stronach lanowe póla pódermo. Bury gronje, až kubłanje lana jo wjelgin riskantne, dla togo muse naše wólejnikarje swóje surowizny za wětšy part we wukraju kupiś.

Zwězk „Spreewald“ pak wabi z tym, až musy tam byś wětšy późěl domacnych produktow pśeźěłany, a to z nanejmjenjej 51 %. To jo teke kšuśe we jich wustawkach póstajone. Dla togo su wabili w slědnych lětach pla burow za to, až kubłaju lan. A prědne wuspěchy južo maju, lětosa kubła se lan na 167 hektarach, pišu na swójich internetnych bokach.

Jaden, kótaryž južo wjele lět lan kubła, jo bio-bur Hugo Melde z Bobowa ze swójim šwigersynom Henryom Gólašom. Familija ma w Dubjem gósćeńc Słowjański dwór, źož z togo lana wólej biju. Toś ten wólej jo za swójsku pótrjebu, což groni, až w tamnej lodce w dwórowej pjakarni wólej pśedawaju. Pjaku tam teke klěb ze zernkow, kótarež su sami kubłali na pólach wokoło Bobowa, teke wót lana.