Festiwal serbskeje kultury w Janšojcach jo měł swóje wjelicke wjeraški njeźelu ze swěźeńskim pśeśěgom a programom na tśich jawišćach.

Ale teke sobutu su měli kšasny a wótměnjaty program. Wón jo zachopił z wótwórjenim wustajeńce w janšojskem muzeju (glědajśo na pśinosk dołojce) a jo dalej šeł z wjelickim pśedstajenim našych lěśojskich nałogow na swěźeńskej łuce. Tam su pokazali Jańske rejtowanje, rejtowanje wó kołac z Noweje Nowy a štapanje wěńca. Pótom stej swěśiłej janšojska a mósćańska młoźina zgromadnje swój lětosny kokot. Se wě, až jo to było wjerašk togo zarědowanja. Luźe su jich znali a to jo było ten pšawy nałog, nic jano pokazanje a rozkładowanje w krotkej formje. Weto jo wjele luźi pótom groniło, až jo to było derje wiześ, co hynźi wšykno dajo. Ale tak pšawje njejsu na prědne póglědnenje wšykne rozměli, kak na pśikład to jańske rejtowanje napšawdu jo. Snaź by dejali raz tam pśipódla byś.