Z Drježdźan/Dresden. Drježdźański filmowy swěźeń jo jaden tych nejwažnjejšych festiwalow za krotkofilmy. W slědnem tyźenju su se tam prezentěrowali produkcije ze cełego swěta pśed jadnab 15.000 woglědarjami. Teke pśipódla jo było wótpołdnjo ze serbskim fokusom.
Filmowy zwězk Sakska, filmowa seś Łužycafilm a Załožba za serbski lud su pśepšosyli do wile Lingnerschloss na zarědowanje „Wiźeś.Sichtbar.Widźomne“.
W programje su tśi serbske filmy wiźeś byli: DEFA-produkcija „Gaž wětšyk dujo...“ wót Tonija Bruka, dokumentarny film „Som doma“ wót Luca-Else Mauritz a Lukasa Mutschlera, tak ako naš film „Pytaś a Namakaś“ (wót Luka Golinskego a Miry Dubianojc). Wušej togo jo se prezentěrowała nowa monografija k stawiznam serbskego DEFA-filma w casu DDR z titelom „Sorbische Filmlandschaften/Serbske filmowe krajiny“ wót dr. Grit Lemkoweje a dr. Andy Rädera. Mej (Luka a Mira) smej se wjelgin wjaseliłej, až dajo móžnosć serbske filmy na takem zarědowanju pokazaś. Za to comej se hyšći raz wuźěkowaś!