Jadnučki dolnoserbski pśinosk, na kótarychž wótglědajucy wót kulturnych notickow we aprylskem Rozhlaźe nadejźomy, jo z pjera Justyny Michniuk. Wót njeje cytamy recensiju k nowym wót towaristwa „Kólesko“ wudanych knigłow „Slěpjańska burska drastwa. Swaŕba“. Awtorka pokažo teke pśirownowanja k pólskim a drugim słowjańskim tradicijam wokoło swajźby, wuzwignjo we tych knigłach kapitel wó swajźbnych gercach a dudach a chwali: „Dotychměst źe njejo nichten serbsku narodnu drastwu na tak kradosćiwu detailěrowanu wašnju wěcownje wopisował.“.

Daś pak teke zajm na wobalku togo wudaśa Rozhlada chylijomy. Pokažo se kolaža cłonka Kolektiwa wakuum Rahel Zelnakec. To pśedstajone: muskece jatšowne rejtarje na jadnom boce, serbski feminizm na drugem boce, ako ma tych rejtarjow kšuśe pśed wócyma. Jo, tym žeńskim ga njejo dotychměst dowólone, se na jatšownem rejtowanju wobźěliś. Komentar wuměłcowki ku tej temje cytamy ako zawjedujucy tekst togo Rozhlada.