Serbski komponist Jan Cyž z Budyšyna jo dotychměst bogaśe pśinosował k serbskej klasiskej muzice a to dalej z wjelikeju akribiju wugba. Alfons Wićaz jo se z nim rozgranjał.

Licba serbskich komponistow, ako se z klasiskeju muziku zaběraju, jo se pómjeńšyła. Wy z gjarstku dalšnych komponistow klasiskeje muziki na tom pólu dalej aktiwnje producěrujośo. Co jo w slědnem casu z Wašogo pjera wujšło?

Jan Cyž: Pla mnjo běžnje nowe kompozicije, nowe twóŕby nastawaju. Ja tak źěłam, až to pśesajźijom, což rowno zacuwam abo což na dopórucenje pśijaśelow muziki twórim. Mimo togo som w Bramborskem towaristwje Nowa muzika z.t. (neue-musik-brandenburg.de), kenž kuždolětnje wugótujo festiwal za nowu muziku pód motom „intersonanzen“. Na ten festiwal se pśepšosuju pśecej dobre a teke mjazynarodne wuměłce a kupki kaž teke ansamble. Cłonki našogo towaristwa stawnje za wobźělnikow festiwala nowe twóŕby komponěruju. Ja pišom lětosa twóŕbu za „Cracow Duo“ z Krakowa, za wioloncello a klawěr pód titelom „pax optima rerum – pokój zgoda“. Prapremjera buźo 26. apryla w Krakowje.