Z Města/Cottbus. W nalěśu 2023 jo se wótměła w Chóśebuzu a drugich městach a gmejnach w Nimskej akcija „Stadtradeln“ (engelski city cycling, serbske mě musymy akle pytaś). Wó tej akciji jo informěrował tegdy Casnik (NC20/2023). Wěcej wót togo móžośo zgóniś na pśikład na boce města cottbus.de abo na boce teje akcije www.stadtradeln.de/cottbus. To njejo był prědny raz, gaž jo Chóśebuz był pódla, ale prědny, gaž mjazy kupkami jo była teke jadna z mjenim Serbske kólasarje/kólasaŕki. Tu kupku jo zawězała jadna wót kolegowkow z Serbskego instituta, Wencke Njebacojc. Som jej za to wjelgin źěkowna, dokulaž jo z tym wubuźiła zasej mój lušt za kólasowanje. W pśirownanju z drugimi teamami jo se nam dosć derje raźiło, lěcrownož smy byli jano sedym luźi. A toś se naźejam, až w tom lěśe změjomy zasej taku kupku, za kótaruž by kśěła ned wabiś. „Stadtradeln“ buźo tenraz w Chóśebuzu wót 4. až do 24. maja.