Ze Slěpego/Schleife. Skóro buźo w Slěpem kóńc z pytanim za parkowańskim městnom blisko dwórnišća a z pytanim za městnom, źož pśiducy bus wótjězdźi. Teke pśistup k pśistupnišćam (Bahnsteige) buźo lažčejšy. Chylu to pak hyšći trajo, až buźo how nowa wjelika stacija wósobowego bliskowobchada (ÖPNV-Schnittstelle) dogótowana. To ma teke z tym cyniś, až zwisujo ten wobchadowy projekt pśi wjelikem dwórnišćowem kśicowanišću z pśetwarjenim Lejnikojc Wile (Villa Lehnigk) k strowotniskemu centrumoju. Tam ga budu wšake pśiwariś. Wšykno to musy byś kóńc lěta 2026 dokóńcone, dokulaž pón jo kóńc spěchowańskeje periody k financěrowanju togo cełkownego projekta.

Tuchylu su nejpjerwjej južo busowe pśistupnišća (Bussteige) zapołožone. We tych dnjach se daju do asfaltěrowanja jězdnych cerow z pśizamknjenim na Krejzowu drogu (Kreisstraße). Firma „Beton-Krautz“ z Nowego Města/Sprjewja (Neustadt/Spree) jo librowała chódnikowe kamuški.

Dogótowanje nowego wobchadowego centruma jo za 31. maja pśedwiźone. Pón změjomy tam tśi busowe pśistupnišća a 18 parkowańskich městnow za awta.