Z Hochoze/Drachhausen. Jo južo tradicija, až premjery dolnoserbskich źiwadłowych kusow se wótměju w Hochozy. Toś teke zachadnu sobotu rownocasnje z jubilejom 50 lět serbske źiwadło w Dolneje Łužycy. Madlenka Šołćic ze Serbsko-Nimskego ludowego źiwadła Budyšyn jo premjeru wótwóriła a jo k grajnemu městnoju Hochoza, wósebnje za „Złoty plon“, slědujuce góźece słowa namakała: „Jo rědnje zasej how byś, źož my se doma cujomy.“

Nowy kus bazěrujo na krotkowulicowańku Marcusa Kóńcarja a jo pšawa prapremjera. Knigły k tomu jo režiser Alexander Marusch napisał, do dolnoserbšćiny jo to Fabian Kaulfürst pśełožył. Źiwadłowe graśe jo „Błośański krimi“, to groni pódtitul kusa „Smjerś pó štuckach / Tod nach Strophen – Ein Spreewaldkrimi“.