Z Barlina/Berlin. Wót maja pśiducego lěta płaśe w Nimskej nowe póstajenja za familijowe mjenja. To jo Zwězkowy sejm slědny tyźeń wobzamknuł. Teke za serbske žeńske a źowća to płaśi. Te mógu se pón do swójich amtskich dokumentow – na pśikład do personalnego wupokaza – daś zapisaś swójo swójźbne mě „pó serbsku“. To groni na pśikład z „owa“ abo „ojc“. Wšykne formy su pśi tom móžne, teke te, ako se wužywaju w slěpjańskej wósaźe.

Za to jo zagronite stawnistwo (Standesamt). Notne pak jo, až se ta wósoba, ako co swójo mě pśeměniś do serbskego, dej se wuznaś ako Serbowka abo Serb.

To nowe rědowanje płaśi teke za luźi z drugich słowjańskich krajow, ako su žywe w Nimskej a maju nimski wupokaz.

Chwalbu jo toś ta reforma mjenjowego pšawa teke dostała pla Frizow a Danow, ako su žywe ako narodna mjeńšyna w Nimskej. Wóni mógu pón teke wužywaś swóje tradicionalne swójźbne mjenja. Pla Frizow buźo to na pśikład tak, až móžo jaden muski swójo swójźbne mě nowo póstajiś pó pśedmjenju swójogo nana. Gaž se tomu groni „Jan“, móžo z togo nastaś nowe familijowe mě „Jansen“. Pla Danow mógu do mjenjow pśiwześ dańske pismiki.