Z Bórkow/Burg. Lětosa wótcakujo woglědarjow Błośańskeje nocy powěsćow zasej spektakel wó tšojenjach znatych serbskich powěsćowych figurow pśed impozantneju pśirodneju kulisu Bismarckowego torma we Błotach.

Jan, muski srjejźnego starstwa, tužy se dla swójich zgubjonych žywjeńskich lět a póžeda se za gluku. Njezjapki we žwalecej kurjawje Błotow, wobguslujo jogo jadna fata morgana wjelikeje gluki a wón póra se do dyrdakojstwa, tu wjeliku gluku łapiś. To buźo za Jana drogowanje, kótarež zwěžo zmyrkotajucu pśibytnosć z mystiku.

Swět fantazijow a swět cowanjow se splějotej a serbske powěsćowe figury ako teke serbski swět bogow wopytaju na swójsku wašnju Jana wobwliwowaś. Wón dožywijo spócetk dobroty a złosći, gluki a njegluki. Ale pśecej gaž se mysli, až źaržy gluku w rukoma, pśiźo zły plon do graśa. Jan dožywijo kórtowarjow, kótarež jano kórty měšaju, weto njegraju. Su to kórty jogo žywjenja? Jo teke joker gluki pódla?