Pónjeźele, 12. julija, su se na kjarchobje na Górach napśecej rozžognowali z jadnym wobydlarjom, kótaregož su wšykne we jsy wjelgin cesćili. Jo to Maks Jazer/Max Jaser, kenž běšo 3. julija, 89 lět stary, wumrěł.

Nic jano we jsy, ale tek w susednych jsach, jo wón był wjelgin znaty ako kołoźej, ako wjelgin nazgónity a mudry mejstaŕ we tom rucnikaŕstwje. Njelicobnym luźam jo wón pomogł ze swójim źěłom ako kołoźej a casy teke ako blidaŕ. Wón ga njejo był ten prědny w Jazerojc familiji, ako jo take źěło cynił. Južo w lěśe 1892 ga běšo Oskar Jazer – wón jo pśišeł z Wusokeje pla Wětošowa – załožył na Górach swóju źěłaŕnju a twarili su how burske woze, cepy, toporišća za kósu, kólasa za wóze, jabrje a wjele drugego, což su serbske a nimske burske luźe trjebali.