Z Wórjejc/Hoyerswerda. Srjodu tyźeń su pśišli wukniki tśeśego lětnika wórjejskeje zakładneje šule na wósebnu wucbu serbšćiny w domje Domowiny we Wórjejcach. Pódla jo był teke Werner Sroka, kenž ako zastupnik Domowiny ako póraźujucy cłonk šulskeje konference na Zejlerjowej šuli statkujo. Za tym až su w zagroźe zgromadnje snědali, jo regionalna powědaŕka Sonja Hrjehorjowa jim w brožni „Dyrdomdeje Pumpota – šibałca ze Spal“ z pomocu kamishibai-wobrazow wulicowała. To jo była proba, kak se wobraze a teksty wót wuknikow pśiwzeju, do togo až ten material se do śišća dajo. Tuchylu se tek pśigótujo powěsć wó pśezpołdnicy ako wobrazowa mapa za kamishibai-źiwadło, z pomocu pjenjez z wuběźowanja „Čiń sobu“. Wótpołdnjowy program jo wobstojał ze wšakich graśow w zagroźe. Wósebne wjasele jo napórało, až tamne kjaglowanišćo jo se skóńcnje zasej wužywaś mógało – wuslědk dalšnego projekta Wórjejskeje župy „Handrij Zejler“ w ramiku akcije „Čiń sobu“.