Z Wjerbna/Werben. Lětko jo faraŕka Vetterickowa w amśe, za ewangelskich kśesćijanow jsow Wjerbno, Myšyn, Rubyn a Brama. Kradu lažko njejo ten zachopjeńk w casu pandemije. Georg Zielonkowski jo se za Nowy Casnik z njeju rozgranjał.

NC: Sćo nowa faraŕka tudy, cośo nam wulicowaś wót Wašeje doněntejšneje žywjeńskeje drogi?

I. V.: Som roźona Žylowaŕka, tamkor som teke chójźiła do tencasneje realneje šule. Pótom som absolwěrowała fachowu abituru w socialnem wobłuku a w Grabinje wuknuła na gójaŕsku wótkubłaŕku. We tom wobłuku som do lěta 2015 wjelgin rada źěłała. Wót 2010 až do 2015 som študěrowała na Ewangelskej wusokej šuli w Zehlendorfje Ewangelsku nabóžninsku pedagogowku a wótzamknuła z masterom. Ako som zachopiła študěrowaś, njejsom pak cil měła, raz farariś. Ja som kśěła wěcej zgóniś wó mójej wěrje, aby mógała luźe pśewóźowaś na swójej droze w nabóžninje.

Gdy sćo wuznali, až cośo raz farariś?