Z Rogozna/Willmersdorf. We wšakich medijach su južo diskutěrowali wó slědach pandemije na wuslědki abiturientow. To nastupa teke wukniki Dolnoserbskego gymnaziuma (DSG), kótarež su rowno w „górucej“ fazy pśespytowanjow. W interviewje z Nowym Casnikom jo Vanessa Ihlojc (rědownja 12a) wulicowała wót abitury w casu korony. Młoda Rogozanaŕka jo nam teke wulicowała wót swójich planow pó šuli a wót projekta, za kenž jo pśeslěźiła serbsku historiju swójeje jsy.
Witaj Vanessa! Kaka jo situacija na Dolnoserbskem gymnaziumje a za tebje?
Dobry źeń! Nowego lockdowna dla jo šulske wjednistwo rozdźěliło naš lětnik pśed jatšowymi prozninami. Pó prozninach njejsmy wěcej měli pšawu wucbu. To jo škóda a wšo to jo nas pitśku znjeměrniło. W tom kritiskem casu by wó wjele lěpjej było, gaby se hyšći raz w šuli pśigótowali na slědne pśespytowanja. Cełu wucbu su ceptarje digitalnje pśewjadli.
Jo taka distancna wucba wjelike wupominanje było za twóju rědownju?