Z Lědy/Lehde. Serbska listaŕka Andrea Bunarjowa (50) jo wót apryla zasej ducy za post z Lubnjowa na Lědy. Cogodla jo zasej wuměniła postowe awto z cołnom, jo wulicowała našomu awtoroju Bernd Marx.

Wjaseliśo se, až sćo zasej na cołnje?

To tako. Jo wjelicnje, pó zymskich mjasecach zasej na cołnje źěłaś, až do oktobra. Tak jo to tradicija wót 124 lět. Do togo su luźe swóje listy sobuwezeli, gaž su namšu šli w Lubnjowje.

Wjele lět „roznosujośo“ listy z cołnom?

To cynim mjaztym źaseś lět, na groblach a tšugach. Nježlic až lětosna sezona jo se zasej zachopiła, njejsom wěcej mógła derje spaś, wjasela dla. W prědnych dnjach mě kradu bóle muskle, ale kuždy na Lědach a teke turisty se kradu wjasele, gaž mě wiźe.

Sćo Błośanaŕka a znajośo štapanje a cołnowanje wót źiśetstwa?