Z Picnja/Peitz. Zapšawym jo nałog, až dolnoserbske ewangelske kśesćijany swěśe drugi źeń jatš serbsku namšu w Picnju. To jo lětosa hynac, korony dla a teke dla njewěstosći, co jaden zapšawym smějo, jo Casnikoju gronił Hartmut S. Leipner. Namša njebuźo, ale cerkwja w Picnju dej byś wótcynjona we zwuconem casu namše, drugi jatšowny swěźeń wót zeger 9:30. Kuždy móžo pśiś a sobu bjatowaś, abo se wjaseliś serbskeje zgromadnosći. Woglědarje mógu sobu wześ nowy zešywk Nowego Wósadnika abo eksemplar serbskeje biblije. Serbska namša buźo nagrawana za rozgłos – a małe wideo ako jatšowny póstrow na youtube. Nagrawanje buźo śichu sobotu gótowe. Wó pśigótowanje se stara Ingolf Kśenka, cytaś buźotej Lothar Burchardt a Hartmut S. Leipner. Youtube wideo se namakajo pśez www.serby-ekbo.de. Na bokach dešańskeje wósady www.evkirchenkreis-cottbus.de/gemeinden/region-spreewald/dissen-ps su wšake materialije za jatšowny cas, wótere serbske, jatšowne kjarliže za zwucowanje a sobuspiwanje. Link na youtube-kanal faraŕki Köhleroweje tam stoj, źož něco serbskego jo pódla.