Ze Žylowa/Sielow. Tuchylu su luźe we swójich kontaktach wobgranicowane. Wóni muse se spokojś z komunikaciju pśez telefon, moderne medije abo z listami. „Postowa pósłanka“ jo za wejsnu pśiradu a wobydlaŕske towaristwo była jadnučka móžnosć, wó to nejžnowše we jsy. informěrowaś. Tej pósłance se groni „Sielow Journal“ a ma južo tradiciju. Prědny raz jo taki pyšny zešywk w adwenśe 2005 doleśeła do listowych kašćikow. Stakim jo wuprobowana droga za informacije.

To aktualne wudaśe jo wěsta alternatiwa k woklapnicy, kótaraž w januarje 2021 jo pandemije dla musała wupadnuś. Pódla su aktualne informacije: W Žylowje jo na 18,82 kwadratnych kilometarjach kóńc lěta 2020 było 3.553 luźi žywych. Towaristwa nadalej wše wobstoje, špontane aktiwity su samo 2020 móžne byli: Zgromadne spiwanje we jsy abo adwentske rozchójźowanje. Hyšći w januarje su Žylojske pśi sańkowanišću zapalili swóje gódowne bomy, kóńc februara su Žylojske se hyšći wobźělili na chóśebuskem karnewalu. Jubilejny swěźeń pśi góźbje „720 lět Žylow“ jo wupadnuł.