Z Gołbina/Eberswalde/Gulben. Młoda Serbowka Ronja Šramojc (21) jo sebje ze 16 lětami naźěłała góńtwaŕske wopismo. Wóna studěrujo rowno gólnistwo w Eberswalde, ale jo teke cesto na familijowem dwórje w Gołbinje. W běgu zachadnego połtera lěta jo wóna mjenjej aktiwna była, ale słuša weto k nejmłodšym jagarjam we swójej domowni. Tam jo cłonk a jagaŕka (ako gósć) w Góńtwaŕskem drustwje Gołbin-Cazow. Wóna wulicujo w slědujucem wó tom hobbyju.
Mój stary nan Fryco jo nazgónity jagaŕ a jo mě pokazał serbsku rěc a góńtwu. To jo mě a móju sotšu pregowało, až smej pśez njogo nawuknułej cytaś slědy a pomagaś w góńtwaŕskem rewěrje. Na zakłaźe togo som južo z 13 lětami prědny raz wubrała zwěrje a wósebnje w šulskem casu som cesto wence była. To jo pókšacowało z wukubłanim na gólnistwownicu (Forstwirtin), som pak měła dlejšu pawzu z togo casa.