Z Janšojc/Jänschwalde. Rüdiger Ruhe (47) jo ako góle z familiju do Dolneje Łužyce śěgnuł a se wjele lět w serbskem swěśe angažěrował. W zakładnej a we wušej šuli jo wón wuknuł serbšćinu, a jo až do lěta 2000 był cłonk Domowiny. Studěrowany gólnistwownik (Forstwirt) jo wjele lět žywy był w starych zwězkowych krajach, ale něnto zasej bydli w Janšojcach. Wón jo pśedsedaŕ w pśedsedaŕstwje Wokrejsnego zwězka jagarjow (Kreisjagdverband Spree-Neiße/Cottbus e.V.), tak ako dowěrnik za šćit pśirody. Aktiwny jagaŕ jo wón ako cłonk gubinskego jagaŕstwa (Jägerschaft), což w slědujucem dalej rozkłažo.

Glědajucy na žywjenje towaristwa jo situacija śěžka. Njamamy dosć móžnosćow, aby rowno zarědowali zmakanja wokrejsnych jagarjow. Smy stwórty nejwětšy zwězk w Bramborskej, ale wšo jo rowno ,na nulu‘ wobgranicowane. Na gluku wobstoj dobry kontakt k drugim jagarjam pśez whatsapp a druge medije. Mamy někak 700 cłonkow a comy wše zapśimjeś do nejwažnjejšych informacijow, kótarež nastupaju zwězk a góńtwu.