Z Budyšyna/Bautzen. Zwězkowy etatowy wuběrk jo 26. nowembra dodatne spěchowanje Załožbje za serbski lud pśizwólił. „Z dodatnym spěchowanim budu tśi dalšne digitalne projekty spěchowane. Z tym statkujo zwězk mócnjej k zdźaržanju serbskeje kultury“, groni Klaus-Peter Schulze (CDU), kenž jo se za rozšyrjenje srědkow serbskeje załožby zasajźił. Za te tśi digitalne projekty dajo pśipłaśonk wót 195.000 euro na lěto a ten se wupłaśijo w běgu pěś lět. Dwa digitalnej projekta zwisujotej z mašinelnym pśestajenim a awtomatiskim spóznaśim rěcy. Tśeśi jo wutwarjenje serbskego portala, pśez kótaryž se zjawnosć wó Serbach a jich kulturje informěrujo. „Zwězkowe kněžaŕstwo, etatowy wuběrk a Zwězkowy sejm su z wobzamknjenim za etat 2021 wuměnjenja dopołnili. Město 19,6, wót 2021 by Załožba lětnje 23,3 milionow euro dostała,“ groni cłonk wuběrka Ulrich Freese. „Kondicija za to jo, až zwězkowej kraja sobufinancěrowanje pówušyjotej aby se dojśpiła suma 23,3 milionow euro“, wudopołnja Freese. Ceły płaśonk za serbsku załožbu 2021 buźo jasny, gaž se góspodaŕskej plana krajowu Bramborska a Sakska wótzamknjotej.