Z Budyšyna/Bautzen. Teke lětosa jo kšywowe towaristwo Domowina wósebnje zasłužbnym cłonkam pósćiło Myto Domowiny tak ako cesne znamuško. Tenraz su pśi mytowańskem zarědowanju – slědny pětk – cele hynakše wobstojnosći se kněžyli ak howac. Tak jo w budyšyńskem Serbskem domje licba gósći wobgranicowana była, na wótstawki jo se źiwało, maski su se nosyli. Ale wjasele se, až zewšym jo se to cesćenje pśewjasć mógało. A pśedsedaŕ Domowiny, Dawid Statnik, jo we swójich póstrowjeńskich słowach wuzwignuł: „Naše prědowniki w narodnem źěle su wjele wětšych wupominanjow zmejstrowali – daś wóni nam su pśikład!“ Wón jo teke na to pokazał, až mytowański wuběrk njejo jadnorje tych nejwušych pó mócy w towarišnosći wuzwólił, ale až stoj „njesebny a zwěrny angažement za byśe a traśe serbskego luda w srjejźišću“, až „serbska cłowjeska dostojnosć“ se mytujo. W tom zmysle jo se wuźěkował lětosnym lawreatam, až su „naše šanse ako Serby z wjele procu a dobrymi idejami pśispórili. To jo pógóń do pśichoda.“