Z Baršća/Forst. Wokrejsne sejmy a měsćańske parlamenty, ako maju wjele cłonkow, njamaju se tuchylu zewšym tak lažko, pśewjasć swóje wobradowanja. Zmakaś se wóni kśě, ale za to trjebaju bejnje wjelike rumnosći, aby mógał jaden wót drugego dosć zdalony sejźeł. Chóśebuske měsćańske wótpósłańce su se w aprylu a něnto teke w maju za swójo pósejźenje wupytali wjeliki zal Měsćańskeje hale. We wokrejsu Sprjewja-Nysa su měli nejpjerwjej prědk, až buźo se wokrejsny parlament z něźi 50 cłonkami we wokrejsnem domje zmakaś jano z mjeńšeju licbu wótpósłańcow z kuždeje frakcije. Jo se pak wopokazało, až za pórědne a demokratiske diskusije a rozsuźenja trjebamy wšych wólonych cłonkow wokrejsnego sejma, to jo tek jich pšawo. Tak jo se groniło a tak su pytali wětšu rumnosć za pósejźenje parlamenta 20. maja. Tu su tež blisko Wokrejsnego doma w Baršću namakali – ga wjelicku sportowu halu.