Něga su to byli serbske ceptarje a ceptaŕki, ako su stojali a źěłali naprědku w młogich Domowinskich kupkach a župach. Wósebnje angažěrowane su wóni byli w pjerwjejšnej Domowinskej župje Běła Wóda. Beno Knop w Trjebinje, Helmut Nowak w Mułkojcach, Manfred Nowak w Miłorazu a młoge druge.

Inga Nowakowa we Wochozach/Nochten jo była teke taka a dalej jo. 13. februara 1940 jo se wóna naroźiła w Domelic serbskej burskej familiji, a wóna jo něnto wóswěśiła swój 80. narodny źeń. Pó zakładnej šuli jo se na styri lěta wudała do Chóśebuza na Serbsku wušu šulu. Pó abiturje jo dalej wuknuła na Serbskem wucabnikojskem instituśe, a ako ceptaŕka za wušy schójźenk za serbšćinu a rušćinu jo pón w Brězowce a Trjebinje a 27 lět w Hamorje/Boxberg wucyła źiśi.