Sobu nejrědnjejšy a nejwěcej wob-lubowany a znaty źěl města Pieštany jo kupa – na jadnom boce rěka Váh, na drugem boce jadna małka pódlańska tšuga ze stojeceju wódu. A rowno w tej něźi kilomejtaŕ dłujkej tšuze a pód njeju štycy to wjelike bogatstwo – ta gójeca wóda a ta módro-carna para, dla teje howko luźe pśidu na kuru, na wustrowjenje. Luźe su južo wjele stow lět dłujko wěźeli, až jo wóda wjelgin na wužytk, su se w njej kupali a ju pili. Samo krale, kardinale a druge wusoke kněze su howko pśišli, aby se wugójili. W 18. stolěśu buchu pón te žrědła za wódu amtojski registrěrowane a 1770 su stajili prědne domy za kupanje. 1850 su chopili twariś te Napoleonowe kupjele ze tśimi domami, 1912 pón kupjele „Irma“ a „Therma Palace“ w młoźinskem stilu a 1915/16 „Pro Patria“. W tom slědnem su w casu 1. swětoweje wójny gójili wokoło 4000 zranjonych wójakow. Wšykne toś te stare historiske kupjele źinsa hyšći stoje a su pla młogich gósći wósebnje z drugich krajow wjelgin woblubowane, teke dla teje cełeje drogotneje architektury.