Z Budyšyna/Bautzen. Teke w Sakskej jo wujadnanje kněžaŕskeje koalicije ­– CDU, SPD a Zelenych – pódpisane. Pśedsedaŕ Domowiny Dawid Statnik jo wjelgin chwali, měnjecy, až wšykne „serbske póžedanja“, kótarež Domowina jo zaprědka pśipowěźeła, su do togo wujadnanja zapisane. Kake póžedanja to su? Za eksemplom bramborskeje Witaj-wucby dej sakski koncept 2plus (za serbsku wucbu) se ewaluěrowaś, a wušej togo stoj we wujadnanju, až serbska wucba na maminorěcnem niwowje dej nadalej wobstojaś. To jo wažne za te wukniki, kótarež pśidu ze jsow a familijow, źož serbska rěc jo głowna rěc komunikacije (pśedewšym w katolskich stronach Górneje Łužyce). To póžedanje jo šym wažnjejše, pśeto „nic wšuźi wobstoj móžnosć serbsku rěc efektiwnje wucyś“, měni Statnik.

Statnik wita tejerownosći to wótglědanje, až serbska rěc dej se wu nich pśipóznaś ako połnogódna „druga cuza rěc“ za nimskorěcne wukniki. „Na našych ‚serbskich wjacorach‘ smy zgónili, až to jo wobydlarjam Łužyce wažne“, komentěrujo Statnik.