Z Depska/Döbbrick. Šułśic Anna a Richard (Matusch) wóttud stej na zachopjeńku oktobera swěśiłej zeleznu swajźbu, to groni: 65lětny jubilej swójogo manźelstwa. Ten cesny źeń jo se za njeju zachopił z namšu w depšćańskej cerkwi. Tu samu jo źaržał wósadny faraŕ Wolfgang Gürtler z města. Pó namšy stej wobej jubilara se sednułej do rědnje wupyšnjoneje kutše a wobjěłej z njeju cełu wjas. Kutša jo jeju dowjadła do šenki pśi sportnišću, źož jo była cesna gósćina pśigótowana. Tym jadnab 70 gósćam su grali gercy wót nAund, nejpjerwjej někotare kjarliže, a pótom do reje. Dla tog, až nicht na druge zajtšo njejo musał na źěło hyś ‒ to ga jo był Źeń zjadnosćenja Nimskeje ‒ su wšykne mógli dłujko a mimo starosći swěśiś, mjazy nimi cłonki depšćańskeje pśirady, ak su pśišli gratulěrowat. A teke tej jubilara stej wóstałej až do połnocy we zalu. Na drugi źeń stej wónej pla swójeje źowki wu Hobrachtojc gósćinowałej dalej.