Z Chóśebuza/Cottbus. Stwórtk tyźeń jo se załožyło nowe towaristwo z mjenim Serbske familijowe towaristwo „Gromaźe“. Wóno jo sebje wustawiło slědujuce cele: serbske kubłanje źiśi a młoźiny mócowaś a pódpěraś, serbsku rěc a kulturu we familiji spěchowaś, nowe rěcne rumy twóriś a pomogaś, aby familije kontakty mjazy sobu źaržali a zgromadne aktiwity we wólnem casu organizěrowali.

Na załožaŕskej zgromaźinje jo se wobźěliło źewjeś luźi. Za pśedsedaŕku su wuzwólili Francisku Albertowu z Wjerbna, za zastupnego pśedsedarja Gregora Kliema z města, a za móšynaŕku Carolu Schulzowu z Wjerbna. Wó załoženje takego towaristwa jo se teke Stefanie Krawcojc mócnje pilnowała.

Towaristwo wóstanjo njezapisane a ma wótglědanje Domowinskej župje Dolna Łužyca pśistupiś. Na dalšnych wustawkach se hyšći źěła.

K jich prědnym projektam buźo słušaś pśidatna wucba za źiśi we serbskej rěcy. Prědne rozgrono ze Šulu za dolnoserbsku rěc a kulturu dla teje wěcy su južo wjadli.