Ze Chóśebuza/Cottbus. W casu mjazy 18. septemberom a 25. oktoberom jo Rěcny centrum WITAJ pśewjadł tśidnjowske dalejkubłanja za wótkubłarki w horśe a źiśowni. Toś te su se wótměli tśeśi raz pó wuproběrowanem koncepśe. 29 wobźělnikow jo było pódla.

Wobźělniki su se mógali wubraś kupku za mjenjej abo wěcej pókšacowane. Źiśownice a hortnarki pśidu ze Strjažowa, Hochoze, Bórkow, Wětošowa, Raduša, Janšojc, Chóśebuza, Žylowa, Tšupca, Mósta a Dešna. Jadna wótkubłarka jo była z Dolnoserbskego internata. Mimo dolnoserbskeje rěcneje prakse, źěła z tekstom a temow ze wšednego dnja źiśownjow su wótkubłarki mógali nowe spiwy nazwucowaś z wuměłcowku Marion Kwicojc.

Wósebnosć tenraz jo była, až stej docenta ze Serbskego instituta dr. Fabian Kaulfürst a Joanna Szczepańska pśedstajiłej wšykne móžnosći webboka www.niedersorbisch.de , mjaz drugim „korpus“, „dolnoserbske słowniki“ a „maminorěcna dolnoserbšćina“.