Z Chóśebuza/Cottbus. Wabiś za jadnu wustajeńcu, gaž wóna južo mimo jo, to jo skerjej nykata wěc. Njejo našym cytarjam ga wěcej móžno, sebje woglědaś to, což se wopisujo. Źo wó wustajeńcu „nitki spominanja a zacuśow“ wót Ellen Lehmann.

Wuměłcowce z Husokeje pla Baršća jo se pśiwobrośił k drugemu razoju Serbski muzej. W galeriji „Haus 23“ su prezentěrowali wót 7. septembra až do 20. oktobra bogaty doglěd do tekstilnego statkowanja žeńskeje, kótaraž jo pśed dwěma lětoma wumrěła a wjele lětźasetkow w Barlinju bydliła.

Dlacog jo Serbski muzej tak zwězany z jadneju wuměłcowku, kótaraž jo wót 1980ych lět wuměłstwo tkała? Wobźělenje pśi wjeźenju pśez wustajeńcu wót kuratorki Christiny Kliemoweje dajo na to wěste wótegrono.