Z Górneje Łužyce/Aus der Oberlausitz. W serbskich jsach Górneje Łužyce běžy tuchylu pódpismowa akcija kupki „Kukowske pšašaki“. Zaměr jo zwěsćiś, lěc Serby tak pomjenjony Serbski sejm ako swóje zastupnistwo akceptěruju.

Slězyna jo, až wjele Serbow w górnoserbskem jědrowem sedleńskem rumje wobmyslenja ma. Iniciatory pódpismoweje akcije wósebnje kritizěruju, až njejo móžno zwurazniś pśi wuzwólowanjach za sejm, lěc Serby tu cełu wěc docełego pódpěruju abo lěc su pśeśiwo tomu.

Pśi wuzwólowanjow za tak pomjenjony Serbski sejm dajo ga jano móžnosć pśigłosowanja. Pśeśiwne měnjenja, ako wjele Serbow ma, njejo móžno se tam zwurazniś. Iniciatory sejma pak gronje, až kśě pówědaś za ceły serbski lud. Wšykne ga by mógali se wobźěliś, jo jich argumentacija. Ignorěruju, až njecujo se wjele Serbow wót nich zastupjony a až dlatogo se njewobźěliju pśi wuzwólowanjach.

Kukowske pšašaki nazběraju pódpisma na zarědowanjach a chójźe teke pó jsach. Južo na prědnem kóńcu tyźenja su nazběrali wěcej ako 200 głosow wót luźi w jědrowem serbskem sedleńskem rumje Górneje Łužyce.