Z Hochoze/Drachhausen. Až se starym luźam na jsach wóstuźijo, to nichten njewěri. Ale někotare wót nich njejsu jano pilne, ale teke aktiwne a towarišne. To pśitrefijo na kuždy part Lotric Manfreda a Reginu z Hochoze. Stej organizěrowałej za 27. julij wulět z kremsarjom za starych wobornikow.

Z dogromady 19 muskimi su byli kradu luštna trupa. Sobu jěli njejsu jano z Hochoze, ale teke z Drjenowa. A dokulaž woborniki se mjazsobu derje znaju, su byli z Manfredom Hobližom samo barbucke pśipódla.

Dokulaž su kśěli te muske na tom dnju něco dožywiś a wšake wiźeś, teke k drugim wobornikam z dalšnych jsow su kśěli woglědaś, njejsu měli kremsar z kónjom, ale z trjekarjom. Na taki part su mógali na gromadu 60 kilomejtarjow jěś.

Ducy su byli nejpjerwjej do Bělina. Ale južo w Běłej Górje su měli prědny stop pla pěskoweje jamy – cas za pśepijank. Ducy su byli ceły cas na twardych drogach. Rědnu wótlažanu wjas Bělin su wobjěli a na něgajšnem dwórnišću jo był drugi stop. Tam jo měła błośańska gusta samo dwórnišćo za pśestupjenje. Za Bělinom jo se cera źěliła.