Halo! Mej smej Lena a Alina a mej comej Wam něnto zmakanje pólskich a serbskich młodostnych wopisaś.

Stwórtk pśed dwěma tyźenjoma 07.06.2018 su wukniki a wuknice ze Zeleneje Góry woglědali do Chóśebuza. Južo w busu su se pśigótowali na našo zmakanje a su pilnje pólske spiwy zwucowali. Pjerwjej nježli smy jich zeznali, su dožywili wjeźenje pśez Rogeński park wjercha Pücklera a pśez zwěrjeńc. Pó wobjeźe w rěcnej šuli jo tak daloko było: wukniki a wuknice ze Zeleneje Góry su pśišli do kafeterije Dolnoserbskego gymnaziuma. Tam smy my, spiwarki a spiwarje dolnoserbskego źiśecego a młoźinskego ansambla, jich pówitali ze serbskimi štuckami, kenž smy pjerwjej we chorje nazwucowali. Ako jo slědny zuk dozněł, jo se wšuźi pyšpotało. Pólske młodostne su gódali, co smy we serbskej rěcy spiwali. Pó spiwanju smy grali wšake zeznawańske graśa, pśi kótarychž su se prědne rěcne zadory pśewinuli. Pó graśach su pólske wuknice spontanje pólsko-nimski kabaret „Schneewittchen – Królewna Śnieżka“ pśedstajili. Chachanje jo se rozlěgało w cełem zalu.