Z Pódstupima/Potsdam. Kulturny śěg z Barlinja do Wrocława pśez Chóśebuz dej dalej jězdźiś, a to teke na pětkach – a nic jano na sobotach a njeźelach a nic jano do septembera 2018, kaž jo tuchylu wustawjone. Take wótmyslenje su zjawili pólske a nimske politikarje a zastupniki nimskeje a pólskeje zeleznice na zgromadnem nimsko-pólskem „zeleznicowem zmakanju“ pónjeźele tyźeń w Pódstupimje na Kejžorskem dwórnišću (pśi parku Sanssousi).

Tam su se zjadnali, až Pólska a Nimska dejtej byś lěpjej ze zeleznicu zwězane, a wjele wěcej śěgow dej pśez granicu jězdźiś. Pśi tom su pódpisali dokument, až maju tu wólu, na zeleznicy z Angermünde k pólskej granicy a dalej do Szczecina dwóje kóleje twariś. To buźo płaśeś 100 milionow euro – jo dał k wěsći ministarski prezident Bramborskeje Dietmar Woidke, kótaryž jo tejerownosći koordinator nimskego kněžarstwa we pólskich nastupnosćach.