Z Chóśebuza/Cottbus. „Kak cośo tomu zadoraś, až njenastanjo ze serbstwom jano nostaligiske gibanje?“ Tak dokradnje su se dopšašali wótpósłańce europskego parlamenta, kenž su zachadny tyźeń na woglěźe we Łužycy byli, w Dolnoserbskem gymnaziumje. Te wótposłańce, cłonki peticiskego wuběrka europskego parlamenta, su byli how, aby sebje swójski wobraz twórili k slězynam dweju peticijowu na europski parlament, kótarejž se zaběratej ze Serbami a znicenim a wobškóźenim wobswěta pśez wudobywanje a spalenje brunice.

Prědna peticija wót Hannesa Wilhelm-Kella z lěta 2015 pomina pšawizniski a politiski šćit Serbow pśed slědami wudobywanja brunice. Druga peticija z lěta 2017 wót Barlinarja Oliver Powalla měri se na znjerěšenje rěki Sprjewja pśez łužyske brunicowe jamy. W europskem parlamenśe su wopytali pówažnje pśediskutěrowaś wšykne detaily wobeju peticijowu w parlamenśe, ale tam w Brüsselu njejsu mógali wšykne detaile rozměś a togodla su se slědne lěto rozsuźili, do Łužyce pśiś a z tak wjele luźimi powědaś ako jo móžno.