Z Dešna/Dissen. Kuždy luź něco zběra, južo w źiśecem a młoźinskem casu abo pśez cełe žywjenje. To mógu byś na pśikład listowe znamki, wósebne knigły a pisma, jo, samo mlokowe kany abo zgła wót sławnych balokoparjow. Teke Heiko Lobert z Kóšnojc/Koschendorf słuša do dłujkego rěda takich pilnych a rozbuźonych zběrjarjow. Jogo lubuški, jogo lubki su stare historiske fotografije, a to ze serbskich jsow, něgajšnych a něntejšnych. A taka wjelika a njewómucna proca se teke wupłaśijo: něźi 1500 takich starych bildow jo wón w slědnych 10 lětach w młogich jsach Dolneje Łužyce južo namakał, a gaž źinsa 51lětny tak pilnje dalej zběra, pón buźo jich snaź nanejmjenjej hyšći raz tak wjele.