Młode luźe protestěruju pśeśiwo politikarjam – teke to jo było wiźeś w jadnom filmje.

Wušej 200 filmow smy mógali wiźeś na 27. filmowem festiwalu w Chóśebuzu. Ze 42 krajow su wóni pśišli, a statistika pokažo, kótare kraje, staty, su byli nejwěcej zastupjone. Ta nam groni to: naprědku stoj jaden kraj, ako jo był na slědnych festiwalach jano rědko abo zewšym nic zastupjony. Toś ten kraj jo Běłorusojska abo Belarus. Z dogromady 37 filmami su z Minska a drugich městow pśijěli do Chóśebuza. To se wě, to su byli pśisamem wšykne krotke abo krotše filmy, ale ta licba za sebje jo napšawdu była wjelicke a rědne pśechwatanje a wobogaśenje lětosnego filmowego festiwala. Tomu jo se teke wjelgin wjaselił pósłańc Běłorusojskeje w Nimskej, kenž jo pśijěł z Barlinja na swětocne wótwórjenje festiwala. Teke Frank Kosik, kótaryž nawjedujo běłorusojski konsulat za Bramborsku a Saksku w Chóśebuzu a z tym se stara za kontakty na góspódarskem, kulturnem a drugich pólach mjazy Nimskeju a Běłorusojskeju, jo to wusoko gódnośił.