Chóśebuz/Cottbus. To njejo za­pšawom jano serbski problem, ale powšykny: Filmowe banty, kótarež laže we archiwach, pómałem rozpaduju. Njebuźo-li se nic staś, ga wjeliki źěł filmowego derbstwa buźo za krotki cas docysta skóńcowany. ­Bramborska a Sakska stej akle pśed krotkim chopiłej se staraś, aby jo ­wuchowali. Wót togo ­profitěrujo teke serbske filmowe derbstwo, we zjawnosći lěbda znate. Tej problematice su na Festiwalu pódzajtšnoeuropskego filma pósćili wósebny dwa­dnjowny sympozium „Fimowe derbstwo wuchowaś – njewidobna historija Serbow“.