Źiśi maju Tśmjelojc Hanu wjelgin lubo. Hana jo nam pśilubiła, až znowa pśileśijo teke k nam, do Dolneje Łužyce. Snaź buźośo ju teke wiźeś? 
Lube źiśi,
we jsy Rowne we slěpjańskich stronach maju teke serbsku źiśownju. Wóna ma rědne mě „Milenka“. Tam jo gano pśileśeła wósebna pcołka na woglědy. Ja wěm, co wy sebje mysliśo. Až źiśi su se jeje štapca nabójali! Ně, ta pcołka nještapjo zewšym. To teke njejo pcołka, ale jaden drugi insekt, ak pódobnje wuglěda: tśmjel (Hummel). A jej se groni Tśmjelojc Hana. To jo zapšawom grajarka Serbsko-nimskego źiwadła w Budyšynje, ako Tśmjelojc Hanu grajo – Katharina Pöpelojc ze jsy Chrósćicy w Górnej Łužycy. Wóna jo we źiwadle elewowka – to groni, až akle na grajarku wuknjo.