Trjebin/Trebendorf. Až do kóńca lěta dej wobzamknjone byś, źo Miłoraske budu se pśesedliś. To jo gronił jich prědkstojaŕ Waldemar Locke na wobradowanju rady trjebińskeje gmejny (Miłoraz k njej słuša) pśedslědny tyźeń srjodu. „78% miłoraskich co tuchylu lubjej, aby jich nowa wjas nastała na slěpjańskich gruntach“. Wejsnej raźe spódoba se sedlišćo (how: Ansiedlungsstand­ort) na połnocnem boce Slěpego, mjazy Lěskom (Lieskau) a zwarbowarskim wobcerjenim, źož jo dejało zaprědka Nowe Rowne nastaś [za planami LEAG pak Rowne njebuźo se wótbagrowaś]. Koncern LEAG njejo hyšći se za njo rozsuźił, wóni pśespytuju nadalej teke jadno se góźece sedlišćo na trjebińskich gruntach.