Brjazyna nad jazorom/Briesensee. Serbske wobydlarstwo w toś tej wjasce wót 230 dušow blisko města Lubin móžo slědk glědaś na wuspěšnu bilancu pśi woplěwanju a zachowanju serbskich tradicijow a nałogow. Wjeliku źělbu na tom ma Domowinska kupka, kótaruž su how załožyli w lěśe 1966. Jeje pśedsedarka Gertrud Heiderowa buźo 3. oktober swój 80. narodny źeń swěśiś, we krejzu swójeje familije, pśiswójźbnych a pśijaśelow.

Angažowanosć za to serbske njebu jej do kólebki półožona, pśeto wóna jo se naroźiła we Wittstocku pśi rěce Dosse. Móžno, až wina na tom su byli geny jeje prědownikow, kótarež su něga raz žywe byli w Dolnej Łužycy, pjerwjej nježlic su śěgnuli prěki a pódlu pśez kraj. Abo jo to była móc lubosći, zwěrnosći a skobodnosći, až su swóju domownju spušćili? Jo, młoda Gertrud – wóna jo tencas źěłała ako statnje pśespytowana archiwarka w krajnem archiwje Schwerin (Mecklenburg-Pśedpomorska) – jo lubosći dla swóju domownju spušćiła. Slědk glědujuca na wěcej ako 50 lět swójogo žywjenja groni Gertrud Heiderowa: „Až som pśišła do Błotow, mam se źěkowaś mójomu cłowjekoju.“