Z Mannheima. K drugemu razoju jo Institut za nimsku rěc w Mannheimje organizěrował wědomnostnu konferencu k mjeńšynowym rěcam w nimskorěcnem teritoriumje a nimšćinje ako mjeńšynowa rěc. Wót 2. do 4. septembera jo se zmakało 40 ekspertkow a ekspertow, aby rěcnopolitiske a sociolinguistiske pšašanja diskutěrowali. Z Dolneje Łužyce su pódla byli Anastasija Kostiučenko-Kessler, Evan Bleakly a Měto Nowak wót Serbskego instituta. Su rozpšawili wó aktualnych slěźeńskich projektach. Anastasija Kostiučenko-Kessler jo do diskusije dała koncept za slěźeński projekt k nastajenjam pśeśiwo dolnoserbskej, pólskej a nimskej rěcy w Chóśebuzu. Evan Bleakly jo prědne wuslědki pśedstajił, lěc wejsne tofle w serbskem sedleńskem rumje wótpowěduju aktualnemu kazniskemu stawoju. Wót Měto Nowaka su zgónili, lěc a kak wěcejrěcne komuny w Nimskej we swójich wustawkach rěduju rěcnopolitiske pšašanja. Wuslědki wšych slěźenjow budu se pózdźej wózjawiś a z tym teke Łužycy spśistupniś.