Z Wodowych Hendrichec/Seifhennersdorf. Pód zapśimujucym motom „džungel“ su dožywili źiśi horta „Lipa“ w Bórkowach a źiśownje „Styri lěntne case“ w Děsnje-Strjažowje w ferijowem lěgwje w Querxenlanźe we Wodowych Hendrichecach wótměnjaty tyźeń połny dyrdakojstwow, graśow a šposa.

Jaden wjerašk jo był mjazy drugim ta „džungelowa olympiada“, pśi kótarejž su wobźělniki a wobźělnice mógali swóje mócy, teamowy duch a šyk dopokazaś. Pśi survivalowem treningu su wuknuli wažne zamóžnosći za pśežywjenje we źiwiznje a su zgromadnje zmejstrowali wjelike wupominanja ako na pśikład ten nałpiny pěsćowy suk.

Su pak teke byli kreatiwne pśi mólowanju t-shirtow. Z pyšnymi barwami su nastali jadnorazne dopomnjeńki na ten dožywjenjow połny ferijowy tyźeń. W džungelowem casino su mógli źiśi swóju gluku testowaś a rědne trofeje dobyś.

Wósebny programowy dypk jo była póznawańska dundanka (Streifzug) pśez tropisku guslowaŕsku gólu, pśi kótarejž su mógli źiśi wjele nadejś. Ale teke pódla tych wjele aktiwitow su wóni měli dosć casa za kupanje, graśe a wódychanje.