Wjele luźi w Dolnej Łužycy njebuźo jogo znaś. Korla jo był zwěrny Serb w Texasu. Jo tam žywy był ze swójeju pólskeju manźelskeju Beatu. Korla běšo Serb pó póchaźe, ako jo był 13 lět stary jo jogo nan jomu to wulicował a wót togo casa jo se Korla zajmował za swóje kórjenje. Ale nic jano zajmował, Korla Wukaš, z engelskim mjenim Charles Wukasch, jo studěrował slawistiku a pótom wuwucował słowjańske rěcy w Americe a drugich krajach. Tak jo był multiplikator teke serbskeje rěcy. Górno- a dolnoserbšćinu jo tak derje nawuknuł, až jo wšykno rozměł a teke mógał dosć normalnu konwersaciju wjasć. Ale to jomu teke njejo dosegało, wón jo napisał, górno- a dolnoserbsku gramatiku inkluziwnje zwucowańske zešywki za swóje rěcne kurse, by mógali groniś, až su to byli šulske gramatiki. Ja som Korlu a Beatu wósobinski derje znała, dokulaž jo mě pśepšosył do Texasa na pśednoski a woglěd w Serbinje, źož su něgajšne wudrogowarje z Łužyce źinsa hyšći žywe. A w tom casu som wumarkowała jogo mócnu słowjańsku skerjej serbsku identitu.