Z Města/Cottbus. Pśi góźbje 75-lětneg wobstaśa Nimskeje UNESCO-komisije jo była Łužyca dnja 15. a 16. apryla gósćinaŕka jadneje wót dogromady tśich regionalnych konferencow w Nimskej. Ako modelowy rum za inowatiwnu strukturnu změnu, pśi kótarejž se zapśimjejotej kultura a wěda, jo se wóna ako jadnučke zarědowańske městno w pódzajtšnej Nimskej wuzwóliła a z tym cesćiła. We fokusu pśi zarědowanju jo stojało pšašanje, kótaru rolu UNESCO-městnosći a imaterielne kulturne derbstwo pśi transformaciskich procesach graju. W chóśebuskem Starem měsćańskem domje jo se ta regionalna konferenca srjodu tyźeń, wjacor, ze swěźeńskim zarědowanim wótwóriła, kenž jo stojał pód motom „zagronitosć za derbstwo“.

Rozsud Nimskeje UNESCO-komisije za Łužycu jo ga tek z tym cyniś měł, až dajo how z projektom „Derbstwo Łužyce | Herbstwo Łužicy“ (teke znate pód mjenim „UNESCO 5“) jadnoraznu kooperacija mjazy institucijami z UNESCO-titlom a Serbami ze swójimi nałogami w běgu lěta ako „imaterielne derbstwo Zwězkoweje republiki Nimskeje“.