Ze Skjarbošca/Schorbus. Wjaska, kótaraž słuša k městoju Drjowk, swěśi lětosa swój 800. jubilej. Ku tej góźbje su wobydlaŕki a wobydlarje južo łoni zachopili se na to pśigótowaś. Prědne wuslědki tych pśigótowanjow su zajźonu sobotu pśi wótwórjeńskem zarědowanju we skjarbošcańskej cerkwi wiźeś byli: nowo wugótowana wustajeńca w cerkwi, kótaraž wopśimjejo serbski multimedialny późěl a swěźeńske pismo, z kótaregož su wujšli knigły z wušej 250 bokami. A wušej togo jo ceła wjaska, rozmjej kuždy dom ze tśirožkatymi chórgojckami wupyšnjony, pśijaznje woglědarjow wuwitała.

Wótměnjaty program w nabitej połnej cerkwi jo se wótwórił z muziku a nagronoma wejsnego prědkstojarja Frank Schätz a drjowkojskego šołty Paul Köhne.