Z Města/Cottbus. Serbska ludowa kultura w DDR jo była wjelebocna a rowno tak wjelebocne su byli luźe, kótarež su ju woplěwali. Wóni su wupyšnili jaja, su źowćam a žeńskim drastwu woblekali abo drastwine źěle kaž parlickowe pyšnjeńki zgótowali, su mólowali abo nawjedowali źěłowe kružki abo kulturne institucije. Wjele z togo casa jo mjaztym pak bóžko zgubjone.

Rowno dla togo jo Daniel Häfner wót Lausitzer Institut/Plon GmbH k swójomu nadawkoju gótował, toś to ludowe wuměłstwowe twórjenje zachowaś a jo pśi tom nacasnu wašnju namakał, wědu tych, kenž su tegdy na pólu ludowego wuměłstwa statkowali a se za to zasajźili a to źělnje źinsa hyšći gótuju, zapópadnuś.