Douglas/Doolish. Wesrjejź Irskego mórja lažy jaden wót snaź nejmjenjej znatych krajow Europy. Jo to kupa Man, abo Ellan Vannin, ako se groni w tamnej rěcy. Ale k tomu pózdźej. Znata jo kupa zwětšego lubowaŕkam a lubowarjam wuběgowanjow motorskich, tak pomjenjonemu TT-race kužde lěto na drogach kupy, pśi kótaremž mógu se wobźěliś njeprofesionelne jězdźarje motorskich. Cas wuběgowanjow jo teke jadnučki cas mimo měra na kupje, kenž howac ma moto „Traa dy Liooar“ (Pśecej pómałem). Wšakim jo teke znata ako rodny kraj cłonkow znateje popkupki BeeGees. Stawizniski zajmowane snaź teke wěźe, až jo kupa we wobyma swětowyma wójnoma městno była, źož jo Britaniska interněrowała Nimcow a drugich ciwilnych staśanow z winikojskich krajow.