Z Dešna/Dissen. Srjodu tyźeń wótpołdnja jo był wjeliki nawal pśed Domowniskim muzejom w Dešnje. Pśicyna za to pak njejo było wótwórjenje noweje wustajeńce, ale wósoba, kótaraž jo w běgu swójogo wušej 30-lětnego statkowanja tam tomu pśinosowała, až jo muzej źinsa ten skóro nejwuspěšnjejšy w regionje – to grono jo wót Babette Zenkeroweje. Dłujkolětna wjednica dešańskeje drogostki jo se na tom dnju rozžognowała na zasłužony wuměńk. Dłujki jo był rěd tych luźi, kótarež su kśěli jej chwalobne słowa na drogu daś a małe dary pśepódaś. Mjazy nimi su byli krajny raźc wokrejsa Sprjewja-Nysa Harald Altekrüger, direktor bórkojskego amta Tobias Hentschel, šołta gmejny Dešno-Strjažow Nico Jarick kaž teke wjele luźi ze serbskego a muzejowego swěta.