Z Města/Cottbus. W Chóśebuzu, w měsćańskem źělu Chmjelow, jo se 16. julija wótměł na Naměsće Arnošta Muki wósebny kulturny wjacor pód gołym njebjom. We wobłuku „Open-air-kinowych nocow“, kótarež něnto južo w sedymem lěśe filmowe fany gromadu wjedu, jo se pokazało pśiglědowarjam sedym nacasnych serbskich filmow. Mimo togo su wóni mógali z awtorkami a grajaŕkami filmow do rozgrona pśiś.

Hyšći góźinu do zachopjeńka jo śěgnuło mócne tšurnjenje pśez Chmjelow. Njejo wěste było, lěc filmowy wjacor musy snaź wupadnuś, a luźe su jano pómałem zabrali městna pśed wjelikeju płachtu we improwizěrowanej pśiglědowaŕni. Ale naslědku jo se tam zgromaźiło něźi sto wobydlaŕkow a wobydlarjow Chóśebuza wšakego póchada.

Program jo wobstojał z někotarych krotkofilmow a cełowjacornego grajnego filma. Pśed kuždym filmom jo dało krotke rozgrona z režiserkami abo grajaŕkami, kótarež su pśiglědowarjam doglědy do nastaśa filmow zmóžnili a wutwórili wósobinski zwisk k wuměłcowkam. Temy filmow su byli wšakorake, ale wšykne twóŕby su połne z lubosću awtorkow k swójej serbske kulturje.

*