We wjele jsach w našych stronach jo była lětosna jatšowna noc respektiwnje jo było jatšowne zajtšo wósebnje mystiske. Tak su zazněli pśed schadanim słyńca a mjazy kurjawkami jasne głose žeńskich, kótarež su wó górjejstawanju Jezusa Christusa spiwali.

Śichy pětk w Dešnje

K tradicionelnemu spiwanjeju śichy pětk w Dešnje stej chor „Łužyca“ a Domowniski muzej Dešno do dešańskeje cerkwje pšosyłej. Pśichylone na wósebny nałog jatšownego spiwanja jo zgłosył chor „Łužyca“ pód wjednistwom Majki Stockoweje a Thomasa Dödinga stare serbske žałowaŕske spiwy a jatšowne kjarliže. Wót 25 lět spiwa ten chor na śichem pětku w dešańskej cerkwi. W běgu koncerta jo źaržał lektor Hartmut Leipner wót Kupki serbska namša krotku nabóžninu w serbskej a nimskej rěcy. Cerkwja jo była derje połnjona, což jo teke na dwěma busoma z turistami zalažało.

Gołbin / Gulben